tradisi kelahiran bayi

 

PROSESI KANGGO NYAMBUT KLAIRAN BAYI

A.  Sadurunge bayi lair

1)  MAPATI

Mapati yaiku prosesi kanggo mengeti yen kandhutane wis umur patang wulan.

Adicara ing sajroning prosesi mapati:

·         Ngaji bareng

Surat ingkang diwaca yaiku surat Yusuf lan surat Maryam. Kena apa kok surat Yusuf lan surat Maryam? Amarga, supaya nalika bayi laire lanang/ jaler bisa kaya Nabi Yusuf, lan yen wedhok/ setri bisa kaya Dewi Maryam. Anggone maca Qur’an, biyasane dilakokake karo

tangga teparo.

·         Mbagi sega kluban

Sabubare maca Qur’an, banjur didumi sega kluban.

2)  MITONI

Mitoni yaiku prosesi kanggo mengeti yen kandhutan wis umur pitung wulan.

Adicara ing sajroning prosesi mitoni:

·          Calon ibu utawi tiyang setri ingkang ngandhut menika siram ana ing blumbang utawa kali. Anggone siram nganggo telesan jarit. Jarite ana pitung warna, dinggo gonta-ganti nganti jarit terakhir.

·         Anggota kulawarga lan direwangi tangga teparo utawa sedhereke padha masak maneka warna panganan. Panganan menika awujud ‘berkat’ utawa panganan sing diwadhahi cething.

·         ‘Berkat’ mau didongani karo tiyang sepuh sing dipercaya ana ing dhaerah kono. Sabanjure ‘berkat’ mau dibagekake marang tangga teparo.

·         Wengine, tangga teparo kang biyasane tiyang-tiyang kakung utawa bapak-bapak padha rawuh ana omahe sing lagi mitono mau kanggo donga bareng.

·         Ing pungkase adicara donga mau, banjur mecah kendhi sing wis disiyapake (kendhi isine ana maneka warna panganan kang padha karo sing dibagekake utawa padha sing digawe ‘berkat’). Kendhi mau sing mecah bisa salah siji kulawargane utawa garwane sing lagi ngandhut mau.

Panganan sing dadi sarat mitoni:

·         Pitung werna sambel, kayata sambel bawang, sambel tempe, sambel trasi, lan liya-liyane.

·         Pitung werna woh-wohan, kayata gedhang, besusu, jeruk, lan liya-liyane.

·         Pitung werna palawija kang wis digodhog, kayata tela pendhem (ubi), tela jendral (singkong), gembili, kacang, jagung, lan liya-liyane.

·         Maneka werna jajanan pasar, kayata slodhok, tape, klepon, clorot, joko ngindhil, peli kekipu, lan kupat.

·         Rujak

·         Dhawet

·         Kluban (sayuran kang digawe kluban ana pitung werna).

B.  NALIKA BAYI LAIR

1)  Brokohan

Brokohan yaiku prosesi kanggo sukuran nalika bayi lair. Adicara brokohan biyasane namung mbagi sega kluban sing wis didongani karo tiyang sepuh sing wis biyasa ndongani. Sawise didongani, sega kluban mau banjur dibagekake marang tangga teparo.

C.  SAWISE BAYI LAIR

1)  Puputan

Puputan yaiku prosesi utawa adicara kang dilakoni nalika bayi wis puput utawa tali pusere garing lan ucul. Ana ing adicara puputan biyasane bayi uga diwenehi jeneng.

Prosesi puputan kuwi uga namung sedherhana. Biyasane puputan ngedum sega kluban utawa berkatan sing wis didongani karo tiyang sepuh.

2)  Selapanan

Selapanan yaiku prosesi kanggo mengeti yen bayine wis umur 35 dina (selapan dina). Sabanjure saben selapan dina, kanggo mengeti wetone, bocah mau uga digawekake slametan arupa sega kluban utawa among-among.

Among-among kuwi yaiku sega sing dhuwure ana klubanan lan irisan endhog godhog diselehake ana ing beki utawa nampan sing disemeki godhong utawa kertas minyak sarta ngisore diwenehi beras lan dhuwit receh. Among-among kuwi banjur diiderake utawa didomake marang tangga teparo.