cerita Damar Wulan

DAMAR WULAN

Damar Wulan kuwi ponakane Patih Logender, Patihe Kerajaan Majapahit. Damar Wulan isih keturunan raja, nanging dheweke urip  karo simbahne.

Kanggo golek gaweyan, Damar Wulan dikongkon simbahne lunga menyang Majapahit. Ananging ana ing Kerajaan Majapahit kuwi, dheweke ora disenengi karo Layang Kumitir lan Layang Seta, sing ora liya anake Ptih Logender.

Nalika ngerti yen anak-anake ora seneng karo Damar Wulan lan ora kepengin yen anak-anake saingan karo Damar Wulan, mula Patih Logender ngongkon Damar Wulan dadi penjaga lan pengrumat jaran.

Sanajan namung dadi penjaga jaran sing klambine ora apik, namung biyasa, Damar Wulan tetep ketok baguse. Putri Anjasmara, yaiku putrine Patih Logender, nalika ngerti Damar Wulan sing baguse kaya ngono dadi kepencut. Dheweke nemoni Damar Wulan kanthi meneng-meneng, lan akhire kalorone padha tresna.

Sawijining wengi, Layang Kumitir lan Layang Seta ngonangi Damar Wulan lan Anjasmara sing lagi padha tresna-tresnana. Kalorone banjur nyerang Damar Wulan. Ananging Layang Kumitir lan Layang Seta kalah anggone nglawan Damar Wulan. Mula banjur padha mlayu lan nemoni bapakne, Patih Logender. Krungu critane Layang Kumitir lan Layang Seta, Patih Logender banjur arep menehi ukuman mati kanggo Damar Wulan.

Ananging, Putri Anjasmara nyembah-nyembah karo bapakne supaya aja menehi ukuman mati marang Damar Wulan. Akhire Patih Logender nglebokake Damar Wulan lan Anjasmara ana ing penjara.

Ing panggonan liya, Ratu Kencana Wungu, Ratu ing Majapahit dilamar karo Menak Jingga. Ananging Ratu Kencana Wungu nolak lamaran mau. Mula Menak Jingga banjur nesu lan pengin nyerang Kerajaan Majapahit.

Amarga serangane Menak Jingga, Kerajaan Majapahit dadi ora tenang lan rusuh. Sabanjure, Ratu Kencana Wungu gawe sayembara, sapa sing bisa ngalahake Menak Jingga, yen lanang bakal didadekake bojo, lan yen wedok bakal didadekake dulur. Ananging, Ratu Kencana Wungu banjur entuk wahyu, yen sing bisa ngalahake Menak Jingga kuwi yaiku Damar Wulan, ponakane Patih Logender.

Sanalika kuwi, Patih Logender dikon mbebasake Damar Wulan saka penjara. Damar Wulan dikongkon ngalahake Menak Jingga. Damar Wulan lan Patih Logender sarta para prajurit banjur menyang ana ing Blambangan kanggo nyerang Menak Jingga.

Nalika wis tekan, Damar Wulan banjur nuju paviliun para selire Menak Jingga. Para selire Menak Jingga, yaiku Dewi Wahita lan Dewi Puyengan padha kepincut karo Damar Wulan marga Damar Wulan sing bagus banget. Para selir mau banjur dadi pengikute Damar Wulan.

Ananging, marga Menak Jingga sekti, dheweke ngerti yen para selire lagi karo Damar Wulan. Menak Jingga banjur niliki paviliun, lan tenan wae, ana kono para selire wis karo Damar Wulan.

Menak Jingga lan Damar Wulan padha gelut, anging Damar Wulan kalah. Dheweke ambruk lan semaput. Menak Jingga banjur ngongkon prajurite supaya njaga Damar Wulan. Nalika kuwi, para prajurite malah turu. Iki dadi kesempatane para selir. Dewi Wahita lan Dewi Puyengan banjurnyedhaki Damar Wulan lan menehi ngerti apa sing dadi kelemahane Menak Jingga, yaiku Gadha Wesi Kuning.

Wengine, nalika Menak Jingga lagi turu, Dewi Wahita lan Dewi Puyengan alon-alon njupuk Gadha Wesi sing ana ing peturone Menak Jingga. Sabubare bisa dijupuk, Gadha Wesi Kuning mau banjur diwenehake Damar wulan.

Esuke, Damar Wulan nantang gelut Menak Jingga. Menak Jingga kaget nalika Gadha Wesi Kuninge ilang. Menak Jingga kalah lan sirahe dipenggal karo Damar Wulan.

Sawise kuwi, Damar wulan bali ana ing Majapahit gawa sirahe Menak Jingga kanggo bukti. Ananging nalika tekan ngarep hastana utawa istana, Damar Wulan diadhang Layang Kumitir lan Layang Seta. Layang Kumitir lan Layang Seta mau arep ngrebut sirahe Menak Jingga. Damar Wulan dikroyok nganti mati.

Layang Kumitir lan Layang Seta akhire bisa gawa sirahe Menak Jingga lan diadhepake ing Ratu Kencana Wungu. Ananging Damar Wulan banjur teka ngadhep Ratu Kencana Wungu, banjur crita apa sing sabenere kadadeyan. Layang Kumitir lan Layang Seta kaget nalika weruh Damar Wulan urip maneh. Jebule Damar Wulan mau diuripke maneh karo pertapa sing sekti.

Sabubare mangkono, Damar Wulan gelut karo Layang Kumitir lan Layang Seta. Dheweke bisa ngalahke kalorone mau. Pungkase, Damar Wulan diangkat dadi Ratu ing Majapahit, lan dadi manten karo Kencana Wungu. Kencana Wungu uga ngijinake Anjasmara lan selire Menak Jingga (Dewi Wahita lan Dewi Puyengan) dadi bojone utawa selire Damar Wulan.