SUMINTEN
EDAN
Adegan
I
Kahanane Kadhipaten Trenggalek
lagi rusuh. Ingkang gawe rusuh menika yaiku brandhalan-brandhalan kang dipimpin
karo Singa Gobrah, Singa Loreng, lan Singa Limbad. Para warga ing Kadhipaten
Trenggalek dadi padha wedi lan ora tenang marga polahe brandhalan mau.
Nalika brandhalan-brandhalan mau
padha omong-omongan ana ing hutan, prajurit-prajurit Trenggalek kang dipimpin
karo Patih Trenggalek teka. Prajurit mau arep padha numpas brandhalan sing wis gawe
rusuh Kadhipaten Trenggalek.
Adegan
II
Para prajurit Trenggalek lan
brandhalan padha adu kekuwatan. Siji baka siji prajurit lan bradhalan mau maju
lan tarung.
Adegan
III
Patih Trenggalek nglawan Singa
Gobrah, Singa Loreng, lan Singa Limbad. Ananging Patih Trenggalek kalah, banjur
lunga karo prajurit-prajurite.
Adegan
IV
Patih Trenggalek lan
prajuri-prajurite mau tekan ana ing pinggir alas. Patih banjur nemoni Warok
Gunaseca kanggo njaluk tulung numpas brandhalan-brandhalan sing gawe rusuh
Trenggalek. Warok Gunaseca nyaguhi anggone numpas brandhalan kang dipimpin
Singa Gobrah, Singa Loreng, lan Singa Limbad. Dheweke banjur pamit karo Patih
Trenggalek lan lunga goleki para brandhalan mau. Patih lan prajurit-prajurite
uga lunga anuju Kadhipaten.
Adegan
V
Singa Gobrah, Singa Loreng, lan
Singa Limbad sarta anak buwahe lagi padha lungguh ing hutan. Nalika lagi padha
omong-omongan, Warok Gunaseca teka. Jebule sing dadi dhalange karusuhan ing
Kadhipaten Trenggalek mau yaiku warok Gunaseca dhewe. Mula mau nalika dikongkon
numpas para brandhalan, dheweke nyaguhi kanthi gampang lan entheng banget.
Warok Gunaseca crita yen lagi ana
sayembara ing Kadhipaten Trenggalek. Sayembara mau kanggo sapa wae sing bisa
numpas para brandhalan sing wis gawe rusuh ing Kadhipaten Trenggalek bakal
diwenehi hadhiyah.
Brandhalan-brandhalan mau padha
ribut yen bakal ngajar lan mateni sapa wae sing wani numpas para brandhalan
mau. Ananging banjur padha kaget nalika Warok Gunaseca omong yen dheweke sing
bakal numpas brandhalan mau.
Warok Gunaseca nerangake
rencanane. Dheweke ngongkon para brandhalan mau supaya ethok-ethok dicekel lan
gelem digawa ngadhep Adipati Trenggalek (Adipati Sudibyangalim). Ananging Warok
Gunaseca melingi supaya aja ngomong yen dheweke sing ndalangi kerusuhan ing
Kadhipaten Trenggalek.
“Mula cukup semene wae kowe-kowe
anggone gawe rusuh!” Warok Gunaseca ngomong karo para brandhalan mau.
“Sampeyan ki pripun ta? Mula
sampeyan ki sing ngongkon. Kadhipaten Nggalek wis kadhung rusuh,” Singa Gobrah
semaur.
Warok Gunaseca banjur omong maneh
yen dheweke bisa nyekel brandhalan-brandhalan, bakal entuk hadhiyah. Sawise kuwi
para brandhalan banjur sarujuk.
Adegan
VI
Ana ing njero Kadhipaten
Trenggalek, Patih lagi ngadhep Adhipati Sudibyangalim. Patih nglapurake yen
dheweke lan para prajurite durung bisa numpas para brandhalan-brandhalan kang
gawe rusuh. Dheweke uga crita yen anggone numpas para brandhalan mau njaluk
tulung Warok Gunaseca.
Let sadhela, Warok Gunasecateka
karo Singa Gobrah, Singa Loreng, lan Singa Limbad sing wis dibanda tangane.
Sawise ngaturake sembah, Warok Gunaseca nglapurake yen dheweke wis bisa nyekel
pimpinan para brandhal sing gawe rusuhe Kadhipaten Trenggalek.
Adhipati Sidibyangalim banjur ngintrogasi
katelu Singa mau. Singa Gobrah, Singa Loreng, lan Singa Limbad ora nglapurake
yen Warok Gunaseca sing ngongkon gawe rusuh. Katelune padha reka-reka dhewe apa
sing dadi alesane gawe rusuh. Ana sing muni marga butuh dhuwit kanggo nguripi
anak-anake sing akeh, ana uga sing uni kanggo bayar utang.
Warok Gunaseca banjur njaluk
Adhipati Sudibyangalim mbebasake para brandhalan mau, lan ngomong yen dheweke
sing dadi jaminan kanggo para brandhalan mau. Sawise para brandhalan mau
dibebasake, Warok Gunaseca diwenehi hadhiyah karo Adhipati. Hadhiyahe yaiku
anakke Warok Gunaseca (Suminten) bakal didadekake manten karo anakke Adhipati
Sudibyangalim kang jenenge Raden Mas Subroto.
Warok Gunaseca banjur njaluk
pamit marang Adhipati lan bakal nyiapake pesta mantenane anakke karo Raden Mas
Subroto.
Adegan
VII
Adhipati Sudibyangalim sing lagi
lungguh ana singgasanane nyelukake anakke, Raden Mas Subroto. Sawise Subroto
teka, dheweke nerangake apa kang wis direncanakake. Subroto diomongi yen
dheweke bakal dijodhohake marang anakke Warok Gunaseca sing jenenge Suminten.
Ananging, Raden Subroto ora
sarujuk lan wegah dijodhohake marang Suminten. Adhipati banjur omong yen
Subroto ora gelem dijodhohake marang Suminten, mula dheweke bakal diusir saka
Kadhipaten Trenggalek.
Sadurunge diusir, Raden Subroto malah wis
minggat dhisik. Dheweke wegah dijodhoke marang Suminten.
Adegan
VIII
Ana ing hutan, para emban padha
nembang lan jejogedan. Banjur Cempluk teka lan nggabung karo para emban mau.
Sanalika kuwi Jin Genthong lagi liwat lan weruh Cempluk. Dheweke banjur seneng
karo Cempluk lan nggodhani. Cempluk sing digodhani wegah marga wujude Jin
Genthong sing elek. Cempluk banjur mlayu lan ditututi karo Jin Genthong.
Adegan
IX
Cempluk dioyak karo Jin Genthong.
Nalika kuwi Raden Subroto uga lagi liwat hutan, banjur weruh Cempluk sing lagi
dioyak-oyak karo Jin Genthong. Raden Subroto nulungi cempluk saka Jin Genthong
mau.
Adegan
X
Ana ing ngalas, bapakke Cempluk,
yaiku Warok Suramenggala lagi macul. Let sadhela, bojone lan bocah wadon
(embane) teka gawa rantang (ngirim sega) kanggo dhahare Warok Suramenggala.
Nalika kuwi, Cempluk banjur teka,
lan kandha bapakke yen dheweke dioyak-oyak karo Jin Genthong.
Raden Subroto banjur teka. Warok
Suramenggala weruh tekane Subroto langsung nyerang Subroto. Ngertine sing
ngganggu Cempluk mau Raden Subroto. Cempluk banjur nrerangake yen Subroto kuwi
sing nulungi dheweke saka Jin Genthong.
Jebule Jin Genthong isih nututi.
Dheweke kepengin ngepek bojo Cempluk. Warok Suramenggala menehi sarat kanggo
Jin Genthong yen kepengin dadi manten karo Cempluk, yaiku bisa nggujeng utawa
nampani sabuk kang bentuke kaya usus warnane putih.
Ananging Jin Genthong gagal, ora
bisa nampani sabuk mau. Dheweke banjur malyu lunga.
Adegan
XI
Jin Genthong ora bisa nampani
sabuke Warok Suramenggala. Dheweke banjur lunga nemoni paklike sing lagi tapa.
Paklike banjur menehi usul yaiku bakal ndadekake rupa Jin Genthong dadi kaya
Subroto.
Tenan wae, ora suwe Jin Genthong
maleh dadi kaya Subroto. Dheweke banjur lunga arep nemoni Cempluk.
Adegan
XII
Ana ing omahe Cempluk, Subroto
nemoni Cempluk. Amarga rupane Jin Genthong wis maleh kaya Subroto, Cempluk ora
ngerti yen sing nemoni dheweke kuwi Jin Genthong. Cempluk gelem wae digawa
melbu ana kamar karo Subroto palsu mau. Nalika Cempluk lan Subroto Palsu lagi
ana kamar, Raden Subroto sing asli teka.
Radeh Subroto asli kaget nalika
ngerti Cempluk lan Subroto palsu lagi ana kamar. Subroto asli lan Subroto palsu
banjur padha gelut.
Nalika lagi padha gelut, bapakke
Cempluk, Warok Suramenggala teka lan misahake kalorone. Bapakke uga bingung
nalika ngerti yen Raden Subroto ana loro.
Warok Suramenggala banjur ngetes
sapa sing Subroto asli lan sing palsu. Anggone ngetes, Warok Suramenggala
njaluk kalorone supaya nampani sabuke sing sekti kuwi. Sapa sing bisa nampani,
mula kuwi Subroto sing asli.
Ananging kalorone padha-padha ora
bisa nampani, marga saking kuwate sabuk mau. Subroto asli banjur ambruk lan ora
sadhar, sing Subroto palsu banjur maleh dadi Jin Genthong maneh. Jin Genthong
mau banjur mlayu lunga. Raden Subroto sing asli mau ditambani karo Warok
Suramenggala.
Adegan
XIII
Ana ing omahe, warok Gunaseca lan
kulawargane lagi nyiapake pesta mantenane Suminten lan Raden Subroto. Nalika kuwi,
ana pengawal sing nglapurake yen perjodhohan antarane Suminten lan Raden
Subroto dibatalake.
Kabeh kulawargane Warok Gunaseca
padha kaget krungu mangkono. Suminten sing wis dandan ayu uga kaget, malah
nganti semaput.
Sawise ditambani, Suminten banjur
tangi. Ananging, Suminten malah dadi edan. Dheweke omong dhewe, ngguya-ngguyu
lan ujug-ujug nangis. Suminten wis dadi edan marga ora sida dadi manten karo
Raden Subroto.
Adegan
XIV
Warok Gunaseca banjur nekani
Warok Suramenggala nalika ngerti yen Raden Subroto ora gelem karo Suminten, lan
malah dadi manten karo Cempluk. Kalorone padha gelut. Anggone gelut padha-padha
nganggo sabuk sakti.
Ananging Warok Gunaseca kalah.
Adegan
XV
Suminten banjur ditambani karo
Warok Suramenggala, sing ora liya pakdhene dhewe. Amarga Warok Suramenggala lan
Warok Gunaseca kuwi kakang adhi.
Sawise mari, Suminten banjur
ditemokake karo Cempluk lan Raden Subroto. Warok Suramenggala sing ngerti yen
Suminten mau jebule wis dijodhokke karo Raden Subroto, mula dheweke banjur
ngomong karo Raden Subroto lan Cempluk. Warok Suramenggala ngomong yen Suminten
bisa dadi bojo kelorone Raden Subroto. Mula kuwi Raden Subroto saiki duwe bojo
loro, yaiku Cempluk lan Suminten.
0 komentar:
Posting Komentar